Legenda:
La recumandaziun vala per il mument be per dunnas en speranza cun ristgs supplementars, sco per exempel diabetes u pressiun dal sang auta.
Keystone
cuntegn
Nova recumandaziun dal BAG - Dunnas en speranza cun ristgs duain laschar vaccinar
Dunnas en speranza cun ristgs supplementars duain pudair sa laschar vaccinar cunter covid-19, sch’ellas giavischan quai. Uschia è la Societad spezialisada per ginecologia ed assistenza al part sa cunvegnida cun l'Uffizi federal da sanadad BAG.
Fin uss avevi num davart dal BAG, che dunnas en speranza na possian insumma betg sa laschar vaccinar. Per cussegliar a tuttas dunnas en speranza da laschar vaccinar hajan ins uss anc retegnientschas, cunquai che paucas datas davart effects secundars sajan enfin uss avant maun.
Enfin la primavaira duain esser avant maun avunda datas, di Daniel Surbek, suprastant da la Societad spezialisada per ginecologia ed assistenza al part. Sch'i na dettia nagins indizis da effects secundars, lura duain er tuttas dunnas en speranza avair la pussaivladad da sa laschar vaccinar cunter covid-19.
