Bunamain trais onns suenter ch’il suveran svizzer ha ditg Na a la carta d’identitad electronica, ha il Cussegl federal deliberà in sboz da lescha per introducir ina schliaziun federala en chaussa. La carta d’identitad electronica duai tenor stan actual star a disposiziun a partir dal 2026.
Suenter la consultaziun è il project vegnì adattà en plirs puncts:
- Per exempel hai dà midadas tar tgi ch'ha il dretg sin ina e-ID,
- tar il process sco tal,
- tar la protecziun da datas,
- tar la favuraivladad per ils utilisaders,
- sco er tar l’organisaziun da support.
Tut en tut saja la e-ID planisada vegnida acceptada positivamain, ha scrit il Cussegl federal. Beneventà saja cunzunt ch'il stadi duai esser il gestiunari da l'infrastructura da confidenza ch'è necessaria per manar la e-ID.
Sco proxim decida il parlament en chaussa. Il mars 2021 aveva la lescha federala davart ils servetschs d’identificaziun electronics fatg naufragi a l’urna. Quai en emprima lingia pervi da dubis da segirezza areguard la protecziun da las datas.