Perscrutaders da l’ETH a Losanna, l’universitad da Genevra e da l’Ospital universitar a Genevra han uschia pudì analisar passa 1'000 provas en il medem mument. Tenor l’ETH a Losanna custa in test radund 50 raps. Cumpareglià cun auters tests d'anticorpuls è questa varianta fitg bunmartgada perquai ch'i na dovra betg tant material da reagenza ed i na dovra er betg persunas dal fatg che piglian sang. Ultra da quai saja la nova metoda fitg exacta. I n'haja da nagins resultats fauss ed ins haja chattà 98% dals cas che hajan gì corona.
Tests d'anticorpuls pon tranter auter vegnir duvrads per mussar, sch'insatgi ha gia gì corona. Pia ins po analisar tge part da la populaziun che ha gia gì il virus ubain er intercurir sche, co u quant ferm ch'il sistem d'immunitad reagescha sin in vaccin.