Tar il cumbat cunter la mafia survegn l'Uffizi federal da polizia, Fedpol, bain infurmaziuns sin ina dumonda concreta. Il Fedpol saja dentant dependent che las autoritads civilas infurmeschian da sai anora, ha ditg la directura, Nicoletta della Valle en in'intervista cun la «Neue Zürcher Zeitung». Ma savens manchia la conscienza quant fitg ch'il Fedpol saja dependent d'infurmaziuns.
I faschess senn da crear in dretg d'annunzia explicit.
Sin la dumonda, tge rolla che la mafia gioghia en Svizra, ha ella ditg che la mafia sa procuria armas en noss pajais e ch'ella furneschia quellas en l'Italia. La Svizra haja bain rinforzà la lescha davart las armas, cun sa participar a la cunvegna da Schengen, ma la Confederaziun n'haja anc adina betg in register central d'armas. I saja grev d'avair la survista. Ins stoppia però vesair ch'ina gronda part da las armas vegnia procurada illegalmain, nua ch'in tal register na midass betg bler.
I saja plinavant da quintar che la mafia taliana emprovia d'infiltrar las autoritads svizras. Qua dettia novas sfidas per il Fedpol. En Svizra dettia 1% commembers da la mafia, stima della Valle.
