Avant var 3,5 onns han ils dus amis Mauro Caflisch da Samedan e Gian Andri Janett da Stugl mintgamai gì – il glindesdi – temp liber tranter lur prelecziuns. En las stanzas da musica da la scola pedagogica a Berna han els lura cumenzà a far musica, han filmà quai – e lura mess sin lur accounts dad Instagram sut il tetel «Musik am Montag». Gia spert ha lur conturn mussà plaschair vida lur videos.
En quella furma han els lura fatg videos enfin circa avant in onn. Là han els per l'emprima giada chantà e sunà tar in video ch'era gia «viral» – damai ch'era gia fitg popular sin las medias socialas. E sinquai èn lura era plirs videos dad els dus ids viral. Il video dad els dus, ch'è vegnì vurdà il pli savens, ha passa 73 milliuns views. Ma er auters videos han per part 20 milliuns, 16 milliuns u sumegliant blers views. Cunquai han els rimnà enorm blers followers. L'entschatta da quest onn è lur finamira anc stada d'avair a la fin dal onn 5000 followers. Ussa han els sin Instagram e Tiktok cumbinà passa in milliun followers.
Quel success han ils dus students da sport gia pudì monetarisar cun collavurar cun differentas firmas. Ed era sch'ins pudess far ina massa raps sco influencer – na saja quella via ensumma betg la via ch'els vulian ir. Els vesan lur gronda plattafurma plitost sco instrument da marketing per survegnir dapli pussaivladads per dar concerts sin nozzas u anniversaris.
Per ils dus megliers amis, ch'èn actualmain vida lur masters, restia la musica vinavant in hobby – era sch'ella ha gia dapi ch'els han emprendì ad enconuscher in l'auter avant 13 onns adina gì ina rolla centrala en lur amicizia.
Or da l'archiv:
