Il 2021 èn mortas en Svizra 71'192 persunas. La cumpart da mortoris cun Covid-19 sco raschun principala è stada tar 8,4%. Cun quai è Covid sin plazza trais davos malsognas dal cor e da la circulaziun (27,6%) e cancer (23,7%). Durant ils dus onns da pandemia 2020 e 2021 hai dà duas periodas nua ch'ins po declerar la surmortalitad cun Covid-19. Durant ina terza perioda, la fin dal 2021, na pon ins betg declerar la surmortalitad entras il coronavirus. Quai mussa la statistica da las raschuns da la mort da l'Uffizi federal da statistica BFS.
Surmortalitad entras Covid-19
Il BFS ha mesirà durant ils dus onns 2020 e 2021 trais fasas cun ina surmortalitad en la gruppa da persunas sur 65 onns. Dal mars fin l'avrigl 2020, da l'october 2020 fin il schaner 2021 e dal november fin il december 2021. Durant questas periodas èn mortas 12'029 persunas (36,4%) dapli che spetgà, da la gruppa da vegliadetgna 65+.
Pli paucs mortoris il 2021 ch'il 2020
L'onn 2021 èn mortas pli paucas persunas pervi da Covid-19. Total èn quai stadas 5'957 persunas. Da quai 3'156 umens (53,0%) e 2'801 dunnas (47,0%). Er il 2021 èn mortas dapli persunas pli veglias dal virus. L'onn 2021 èn dentant mortas pli paucas persunas da la vegliadetgna 65+ vi da corona. Da la vegliadetgna da 0-64 hai dà 147 mortoris dapli ch'il 2020.
19 mortoris pervi da vaccinaziun
Ils 23 da december 2020 ha l'emprima persuna en Svizra survegnì la vaccinaziun cunter corona. Tenor ils certificats da mortoris hai dà l'onn 2021 total 19 mortoris chaschunads pervi d'effects secundars da la vaccinaziun. Qua èn stadas pertutgadas dunnas cun ina vegliadetgna media da 86 onns ed umens cun ina vegliadetgna media dad 80 onns. Sco ils BFS scriva, mussian ils certificats da mortori ch'i haja dà en tut ils cas malsognas accumpagnantas. Il pli savens, numnadamain en 13 cas, malsognas dal cor e da la circulaziun e mintgamai en dus cas demenza e malsognas da la respiraziun.
WHO discurra dad 1 milliun persunas salvadas entras vaccin
En l'Europa e stadis da l'anteriura Uniun sovietica han vaccins cunter corona salvà dapli che 1 milliun vitas da carstgauns dapi la fin dal 2020. Tar questa conclusiun vegn la WHO, l'Organisaziun mundiala da la sanadad en in rapport. Calculà han ins quest dumber a maun dal dumber da mortoris e las dosas da vaccin ch'ins ha dà en 26 pajais. 96% da las persunas ch'ins ha pudì salvar grazia ad ils vaccins èn pli veglias che 60 onns. La gronda part da mortoris hajan ins pudì impedir durant la unda da la varianta dad omicron.