Al tunnel dal Gubrist, datiers da Turitg pudessi en l'avegnir dar pli paucas colonnas en direcziun Berna e Basilea.
Dapi glindesdi è era il terz vial en il nov tunnel da l'autostrada A1 liber per il traffic. Da quel profiteschian mastergnants e millis da pendularis e pendularias sco era il turissem e l'ambient, ha cusseglier federal Albert Rösti ditg tar l'avertura. Fin oz hai dà maximalmain 15 dis senza colonna ad onn. Quai pudess ussa sa midar.
En direcziun Affoltern resti il mument tar dus vials. Quai pervia da la sanaziun dals dus tunnels vegls che dura fin l'onn 2027.