Gia l’emna proxima pudessan intginas mesiras da corona vegnir schluccadas. Concret pudessan la regla da quarantina sco er l’obligatori da lavurar da chasa anora crudar. Quai ha il minister da sanadad intunà venderdi.
Che gist questas duas mesiras pudessan crudar a partir dal mument ch’igl è pussibel, ha ina raschun, sco Alain Berset ha declerà envers SRF.
Per schluccar autras mesiras dovria anc la consultaziun.
Il mument saja la situaziun buna: La unda da omicron n’haja naginas fermas consequenzas negativas per ils ospitals. L’atun u l’enviern proxim pudessia la situaziun però puspè vesair ora tut autra.
Approvaziun ord retscha politica
Politicras e politichers da sanadad beneventeschan la pussaivla schluccada da las mesiras da corona. Il president da la cumissiun da sanadad dal Cussegl naziunal Albert Rösti da la PPS, sco er la cussegliera naziunala Flavia Wasserfallen da la PS, vesan l'annunzia dad Alain Berset a moda positiva.
I saja dentant impurtant, da schluccar las mesiras pass per pass, ha ditg Flavia Wasserfallen envers SRF.