La societad aviatica svizra Swiss na sgola per il mument betg a Hongkong. La raschun èn las mesiras da corona pli severas là. Pertutgads sajan quatter sgols enfin la mesadad dal mais, ha ditg la pledadra da la Swiss, Karin Müller.
A Hongkong ston las equipas dals aviuns esser vaccinadas e sa laschar testar trais giadas sin il coronavirus, avant l’arrivada, subit suenter ed ina giada durant il segiurn. Plinavant na dastgan els durant l’entir segiurn betg bandunar lur hotel. La Swiss haja empruvà d'anflar alternativas, sco per exempel schar durmir las equipas en l'aviun u sgular cun in stop suplementar per lura midar l'equipa per Hongkong. Quai na funcziuneschia dentant ni regulatoricamain ni finanzialmain. La Swiss analiseschia vinavant la situaziun.