En Svizra è il dumber da las plazzas vacantas tar ils pli gronds concerns creschì marcantamain las ultimas emnas. Entant ch'i vegniva il matg anc tschertgà persunal per radund 8'600 plazzas, èsi ussa 9'300 – pia bun 8% dapli. Quai mussa la retschertga dal portal da plazzas «Indeed» sin incumbensa dal portal per novitads en il sectur da finanzas AWP.
Che la tschertga da persunal è per il mument difficila per bleras interpresas mussa la statistica tar las top diesch che drovra il pli bler persunal. Cun excepziun da las Viafiers federalas svizras SBB han tut las interpresas scrit ora dapli plazzas ch'anc avant in mais, per part schizunt marcantamain dapli.
En egl dat er ch'adina dapli plazzas cun funcziun da manar èn er vacantas. Da tut las 9'300 annunzias examinadas sa tracti tar passa 10% da posiziuns categorisadas sco funcziuns da manar. Tendenzialmain auta è er la cumpart d'annunzias per persunas qualifitgadas en il sectur da l'informatica cun passa 6%.