En la viafier regiunala bernaisa BLS na datti nagina mancanza da locomotivistas e locomotivists. Auter che tar la Viafier retica hai là levet memia bler persunal. Perquai han locomotivistas e locomotivists bernais uss la pussaivladad da lavurar enstagl tar la Viafier Retica.
Diesch han fatg quai pass, ed in d'els è Lukas Blatter. El fa midada per dus onns a Landquart per ir cun las locomotivas cotschnas. El di che cunzunt il nov ambient e la nova experientscha fetschia quaida ad el. E sia situaziun privata laschia tiers da bandunar ses dachasa.
La midada en ina locomotiva da la Retica fa da basegn ina furmaziun da tschintg mais. Durant quel survegn Blatter ina paja cumplaina Il manader da persunal da locomotivas da la Viafier retica Carlo Kuster di ch'i dettia intginas chaussas d'emprender: «Il sistem da franar, l'entira topografia, tut las staziuns, differents sistems d'energia, per part autras signalisaziuns, i dat bler».
Superiurs che ston puspè charrar
Che la Viafier retica ha da stritgar colliaziuns ha muventà Lukas Blatter. Ad el plascha da lavurar là nua ch'auters fetschian vacanzas. Cunzunt sa legria el sin il traject tranter Cuira ed Arosa. Sche tut funcziuna tenor plan, lura po Blatter charrar davent da l'avust cun las locomotivas da la retica.
Blatter n'è betg il sulet che siglia en per mantegnair il manaschi da la retica. Ils trens da pendularis che fissan atgnamain vegnids stritgads, vegnan charrads da manaders da team e spezialists che lavurassan en sasez en biro. Er Franco Romano lavurass en sa sez en biro, ha dentant la patenta d'ir cun tren. Ch’el saja magari en la cabina da manischar dal tren na saja per el ed er par ils 46 locomotivists ch’el ha sut el en sasez nagut extraordinari.
Il dat adina servetschs sco locomotivists che nus faschain mintga mais per mantegnair nossa pratica da manischar.
Per ils spezialists u manaders da team che lavuran sco Franco Romano uschiglio normalmain la gronda part en biro muntia quai, ch’els stoppian organisar e disponer in zic auter lur di da lavur quotidiana. Per Franco Romano sa chapescha da sasez da viver la rolla sco bun exempel.
La gronda sfida saja per el ch’i restia pli pauc temp per la lavur da manar cun quai ch’el sesa uss puspè in zic dapli en la cabina da manischar da la pitschna cotschna. Suenter il servetsch da locomotivist tranter Tavau e Filisur la damaun baud va il di per el vinavant cun la lavur quotidiana da biro a Cuira.
Vinavant vegn a temps a l'ur da l'urari mo charrar bus tranter Glion e Mustér, Cuira ed Arosa e Tavau e Filisur. Er tranter Landquart e Scuol vegn viagiar per part pli cumplitgà. Là e tranter Tavau e Filisur impunda la retica dentant ils superiurs ch'avessan atgnamain funcziuns da manar.
