En chaussa libertad da pressa na dumogna la Svizra er quest onn betg tranter ils top 10 dals 180 pajas che vegnan mintgamai prendids sut la marella da l'organisaziun «Reporters senza cunfins». Cun il 12avel rang è la Svizra però vegnida da far bun duas plazzas cumpareglià cun l'onn passà.
La raschun il meglierament è cunzunt la fin da la pandemia. Uschia saja la situaziun sa calmada. Durant la pandemia regiva in clima malvulent cun emprovas da far tema e schizunt da violenza fisica davart d'adversaris da las mesiras da corona.
Che la Svizra survegn mo la nota «plitost bun» è er d'attribuir a l'uschenumnà artitgel da buccarè en la lescha da banca. Tenor quel poi dar per rapports betg autorisads davart datas da bancas enfin trais onns praschun. Sin plaz numer 1 da la libertad da pressa figurescha per la 7avla giada en seria la Norvegia davant il Danemarc ed il Pajais Bass. Sin las davosas trais plazzas sa chattan il Vietnam, la China e la Corea dal Nord.