Parts da la lescha per cumbatter la pandemia da corona duajan valair pli ditg che la fin da l'onn current. La raschun è il svilup intschert. Perquai ha il Cussegl federal decis da far la dumonda per ina prolungaziun al parlament, probabel per 1 onn – quai sco mesira preventiva. Intgins puncts da la lescha pudessan ins duvrar anc pli ditg.
I sa tracta da mesiras en ils secturs sanadad, protecziun dals lavurants e las lavurantas, sport e cultura. Enfin la fin d'october vul il Cussegl federal elavurar il messadi.
Cunter la lescha da Covid han ins gia duas giadas fatg il referendum. Ils 28 da november decidan las votantas ed ils votants per la segunda giada davart il project.
