Il Cussegl dals chantuns n’è uschia betg uschè ambizius sco sia cumissiun per ambient, planisaziun dal territori ed energia (Urek-S) aveva proponì. La maioritad da la cumissiun avess vulì reducir las emissiuns dad autos novs a partir da l'onn 2030 sin 25% enstagl da 45% sco quai ch' il Cussegl federal aveva proponì. Ina segunda minoritad vuleva insumma scumandar l’import d’autos novs che emettan gas cun effect da serra a partir dal 2035.
En la chombra pitschna ha dentant la proposta dal cusseglier dals chantuns grischun Martin Schmid (PLD/GR) da suandar il Cussegl federal chattà ina clera maioritad. Schmid ha pledà per seguir a l'UE. Il martgà svizzer haja da s'adressar tenor la paletta da models dals fabricants europeics, ha agiuntà Thierry Burkart (PLD/AG).
Betg dispitadas eran las finamiras d'emissiun per autos da furniziun ed per camiuns a sella levs che vegnan mess da nov en circulaziun a partir da l' onn 2030. Tenor il conclus dal Cussegl dals chantuns dastgan quels vehichels emetter anc la mesadad da las emissiuns da l'onn 2021.
Sanestra na po betg persvader
La finamira da reducziun che la cumissiun dalla chombra pitschna aveva proponì a partir dal 2030 ed ultra da quai ina finamira da nulla emissiun a partir dal 2035 ha vulì percunter ina minoritad cotschen-verda, ma ella ha fatg naufragi. Lisa Mazzone (Verds/GE) ha proponì da betg pli permetter a partir da l'onn 2035 novs autos ed vehichels utilitars levs fossils. La Svizra duai appartegnair tar ils pli ambizius da l'Europa.