La Svizra saja sin buna via pertutgant la reducziun da CO2 – e na gioghia nagina rolla impurtanta tar la protecziun dal clima globala, argumentescha il comité. E la lescha chaschunia dapli birocrazia, scumonds e taxas.
Quai ha communitgà il comité che sa cumpona da pliras uniuns da la branscha aviatica, d’autos e da petroli. Las suttascripziuns ha il comité rimnà ensemen cun la PPS. Els hajan rabitschà ensemen passa il dubel suttascripziuns che necessari – e quai malgrà ils problems da rimnar suttascripziuns pervi da la pandemia da corona.
Vast sustegn
La nova lescha CO2 vul pass per pass reducir ils gas cun effect da serra. Ella prevesa tranter auter taxas pli autas sin benzin, ieli da stgaudar e bigliets da sgular. Tar la votaziun finala en il parlament a Berna han tut las partidas sustegnì la lescha – cun excepziun da la PPS.
