Ensemen cun autras organisaziuns, ha l'Uniun sindicala lantschà a Berna in'iniziativa dal pievel. Quella pretenda da midar la Constituziun federala, uschia ch'ina 13avla renta saja pussaivla. Tenor ils sindicats na tanschan las rentas da l'AVS betg per viver ozendi ed ellas valian adina pli pauc. Vitiers sa reduceschian era las rentas da la segunda pitga adina pli spert.
En la lescha duai vegnir fixà che la 13avla renta na chaschunia betg che las prestaziuns supplementaras vegnian scursanidas. La lescha duai vegnir en funcziun il pli tard il segund onn suenter che l'iniziativa vegn approvada.
Cussegl da seniors sustegna iniziativa
Davos l'iniziativa dal pievel stat era il cussegl da seniors (SSR). Ils 21 da favrer ha el decidì da sustegnair l'iniziativa. Rentas stoppian cuvrir ils custs per l'existenza, quai saja scrit en la Constituziun federala. La realitad saja dentant autra. La mesadad da tut las persunas che sajan idas en pensiun il 2017, hajan ina renta pli bassa che 3'600 francs or da l'AVS e la cassa da pensiun. Mintga 5avla persuna en pensiun u 350'000 persunas pli veglias, vivian en Svizra en povradad u sajan periclitads da la povradad.
Ord l'archiv
L'AVS – l'assicuranza per vegls e survivents – datti dapi il 1948 en quella furma sco nus enconuschain oz ella. Il 1947 han ils umens svizzers detg GEA ad ella.
RTR novitads 12:00
