Andrea Studer, la vicedirectura da la Deza, la Direcziun per svilup e collavuraziun, na saja per immediat betg pli en uffizi. Quai mussan retschertgas da Radio e Televisiun da la Svizra romanda RTS. Il Departament d'affars exteriurs EDA ha confermà las infurmaziuns. Studer bandunia ses post per la fin d'avust. Fin lura haja ella vacanzas. Tenor RTS haja il cusseglier federal e minister da l'exteriur Ignazio Cassis relaschà persunalmain Studer. El na saja betg stà cuntent cun sia lavur. Studer n'ha fin ussa betg prendì posiziun en chaussa. Era da vart da la Deza na datti fin ussa naginas infurmaziuns pli detagliadas.
Crap da stgarpitsch pussaivel
Andrea Studer era responsabla en la Deza per il Proxim Orient. Tenor Radio e Televisiun da la Svizra romanda RTS pudessan problems da communicaziun en connex cun la finanziaziun d'organisaziuns nunguvernamentalas palestinaisas ed israelianas avair manà a sia relaschada. Suenter l'attatga da l'organisaziun radical-islamica Hamas sin persunas civilas israelianas il cumenzament d'october aveva l'EDA laschà controllar 11 organisaziuns che la Svizra sustegna finanzialmain – sis palestinaisas e tschintg israelianas.
Tar la controlla era vegnì examinà sche las organisaziuns respecteschan il codex da cumportament da l'EDA e la clausula d'antidiscriminaziun. Sco quai ch'il cusseglier federal Ignazio Cassis aveva communitgà il november, n'eran trais organisaziuns palestinaisas betg sa tegnidas a la reglas. Sche la relaschada da Studer ha da far cun ils resultats da questas examinaziuns n'ha l'EDA betg confermà sin dumonda da l'agentura da novitads Keystone-SDA.
