Il Tribunal federal ha decis
Ils tschintg derschaders a Losanna han dà raschun als iniziants enturn Christian Mathis da Küblis e Renatus Casutt da Falera. Senza dubi in success per ils iniziants.
Il Cussegl grond grischun n'avess betg dastgà declerar l'iniziativa per abolir la chatscha speziala sco nunvalaivla. I na dettia nagina cuntradicziun tar il dretg superiur, è vegnì ditg. Quai vul dir ch'il Cussegl grond sto anc ina giada tractar l'iniziativa. Deputadas e deputads pon decider sch'i dat ulteriurs motivs per declerar nun-valaivla l'iniziativa. I saja dentant pauc probabel che quai saja il cas, uschia ils derschaders.
Il Tribunal federal ha era menziunà che la chatscha en il Grischun saja in patent dal stadi. Cunquai haja il chantun la pussaivladad da reglar la chatscha ed ordinar chatscha da reschia. Quai muntass che guardiaselvaschinas e betg persunas privatas reducessan l'effectiv da selvaschina.
Cuntradicziuns da las instanzas grischunas
La regenza, il Cussegl grond e la dretgira administrativa dal Grischun avevan ditg che l'iniziativa na saja betg valaivla cunquai ch'ella cuntrafetschia al dretg superiur, pia a la lescha da chatscha ed a la lescha da guaud.
Els avevan era laschà far in'expertisa giuridica ed ina biologica. Lur argument: Senza la chatscha supplementara na vegnian ins betg da reducir il dumber da selvaschina ed i dettia uschia memia blers donns vid igl guaud.
Iniziants cuntents – adversaris persvas
Ils iniziants da l'iniziativa èn satisfatgs da la decisiun da Losanna. Il Tribunal federal haja confermà la posiziun da l'Uffizi federal per l'ambient che n'aveva vis nagina cuntradicziun cun dretg superiur.
L'Uniun grischuna da chatschaders da patenta da sia vart quinta ussa cun ina votaziun. Els sajan segirs da pudair persvader la populaziun ch'i dovria la chatscha supplementara, ha ditg il president Robert Brunold.
«In signal positiv per nossa iniziativa»
Per l'iniziativa per ina chatscha etica saja la decisiun dal Tribunal federal in signal positiv, ha ditg l'inizianta e presidenta da l'uniun «Wildtierschutz Schweiz» Marion Theus sin damonda dad RTR. Ella quinta ussa che la Dretgira administrativa dal Grischun decleria sco valaivla l'iniziativa.
In punct da l'iniziativa per ina chatscha etica pertutga numnadamain era la chatscha speziala: A partir da l'emprim da november duai dar ina pausa da chatscha. Il Cussegl grond ha declerà 8 pretensiuns da l'iniziativa sco valaivlas e trais sco nun-valaivlas. Actualmain è l'iniziativa pendenta tar la Dretgira administrativa dal Grischun.
RR novitads 11:30
