Il december è la rauba da consum en Svizra stada 1,7 pertschient pli chara, cumpareglià cul december 2022. Quai mussan cifras da l’Uffizi federal da statistica. Il november aveva la chareschia anc muntà ad 1,4 pertschient.
Uss èn era las cifras annualas davart la chareschia avant maun. L’onn passà è quella stada en media tar 2,1 pertschient. L’onn 2022 aveva la chareschia annuala intermediara muntà a 2,8 pertschient, il 2021 a 0,6 pertschient.
Cun la valur da 2,1 pertschient è l’inflaziun era restada il 2023 relativamain moderada en Svizra. En cumparegliaziun ha la Germania gì l’onn passà ina chareschia da 5,9 pertschient.
Electricitad ed abitar han custà dapli
L'augment saja cunzunt d'attribuir a pretschs pli auts per electricitad, gas e fit d'abitaziuns. Quai scriva l’Uffizi federal da statistica. Ils pretschs per products dad ieli, tschertas purschidas da telecommunicaziun e medicaments percunter sajan sa reducids.