Il concern da chemia speziala Lonza ha fatg dapli gudogn e svieuta il 2019. Cumpareglià cun l’onn avant saja il gudogn s’augmentà per 16% sin 763 milliuns francs. La svieuta saja s’augmentada per bunamain 7% sin 5,9 milliardas francs. Quai ha communitgà il concern svizzer. Cun quest resultat ha Lonza ademplì las spetgas dals analists. Las prognosas per quest onn sajan positivas. Il cussegl d’administraziun propona da pajar vinavant ina dividenda da 2 francs e 75 raps per aczia.
Motor da l'interpresa è stada la sparta «pharma biotech & nutrition» che furnescha tranter auter substanzas per medicaments ad auters concerns farmazeutics.
Vinavant tschertgà in nov schef
Sco quai che Lonza communitgescha, cuntinueschia la tschertga d'in nov schef. Il process pudess esser a fin en il decurs dal 2020. Mez november aveva Marc Funk annunzià da sa retrair – suenter esser stà be oset mais en uffizi.
Ord l'archiv da SRF:
RTR novitads 10:00
