Ils resultats da l’enquista fatga l’entschatta 2023 cun 1’126 commembers e commembras da l’armada mussan in basegn d’agir, tenor il comando da l’armada. Tenor il studi han stgars 50 pertschient dals participants a l'enquista vivì durant lur temp da servetsch suenter la recruta discriminaziun. Quai ha l’armada communitgà la gievgia.
40 pertschient han inditgà d’avair fatg tras violenza sexualisada – verbala, nunverbala u era corporala. Ed 81 pertschient han raquintà d’esser stads confruntads darar fin fitg savens cun spruhs e sgnoccas sexisticas en il servetsch. Tranter las persunas pertutgadas èn spezialmain bleras dunnas.
Temp per midar chanzun
Il comando da l’armada vul uss augmentar la protecziun da las commembras e dals commembers da l’armada. Mesiras previsas èn tranter auter ina gruppa da lavur per la protecziun da las unfrendas, e l’introducziun d’in program per pudair annunziar a moda anonima cas da discriminaziun e violenza sexualisada. Quai duai accelerar la midada da la cultura en l’armada.
Jau hai l'obligaziun d'agir.
«Ils resultats dal studi han fatg tema a mai», ha ditg il cumandant da corp Thomas Süssli ad ina conferenza da medias a Berna. Sco schef da l'armada stoppia el uss observar bain la situaziun. I saja sa mussà ch'ils sforzs gia instradads na tanschian betg.
