Per l'identificaziun electronica, l'uschenumnada «E-ID», duai en il futur la Confederaziun metter a disposiziun ina app per il telefonin ch'ins po identifitgar nuncumplitgà. Previs da duvrar questa app per l'identificaziun èsi per pustaziuns online da documents uffizials, sco per exempel l'extract dal register penal, ubain era per cumprovar la vegliadetgna, sco per exempel cun cumprar alcohol en la stizun. Il Cussegl federal ha preschentà sia proposta e la tramess en consultaziun enfin ils 20 d'october.
Controlla e segirezza da las datas
Mintga utilisader duai pudair administrar sez sia E-ID, uschia che l'utilisader haja la controlla maximal pussaivla da sias datas. Ed auter che tar il project che la populaziun ha refusà a l'urna il mars 2021, fiss la Confederaziun responsabla per il manteniment e la gestiun da l'infrastructura che furma la basa per la E-ID.
Per la protecziun da las datas duai il sistem sez procurar. Però duain era las transmissiuns da datas vegnir minimadas e l'arcunaziun duai succeder decentral. Il sistem d'identificaziun duai ademplir standards neutrals, uschia ch'ins pudess tut tenor era duvrar la app en l'exteriur.
App gratuit per tuts cun ina «carta» svizra
La app na duai però betg remplazzar proceduras existentas. Ella duai esser facultativa, uschia che tut ils process analogs vegnissian era salvads. La app duai esser gratuita, e duai era esser acceptada tar tut las prestaziuns da servetschs da la Confederaziun. Però era las autoritads chantunalas e communalas stuessian acceptar la app en lur administraziun. Era per acturs privats duai la app esser appliccabla. La finamira saja dad era possibilitar da metter diploms e tickets electronics en la app.