En tschertas regiuns da vacanzas saja la dumonda uschè gronda ch'ils hotels hajan pudì augmentar lur pretschs. En il Grischun èn quels en media creschids per 4% cumpareglià cun il medem temp da l'onn passà. En il Tessin per 5%. Autras regiun da vacanzas en Svizra pateschian però da pretschs che crodan. En la Surselva bernaisa èn quels sa reducids quest onn per 18% en il Vallais schizunt per 20%.
Differents facturs per il svilup
En il Grischun ed il Tessin giogan tenor l'evaluaziun gist plirs effects ina rolla positiva. Ils chantuns tutgan tar las regiuns perifericas en Svizra, la distanza è per blers relativ gronda. Ord quest motiv fetschian ils blers gist in per dis vacanzas e betg mo in'excursiun dad in di. Plinavant hajan las regiuns gia giu ils ultims onns ina gronda quota da giasts svizzers en cumparegliaziun cun las autras regiuns turisticas en Svizra.
Quai dentant betg exnum voluntari. Suenter la crisa da finanzas, cura ch'il pretsch per l'euro è crudà, èn blers giasts europeics restads a chasa. La Surselva bernaisa, il Vallais e la regiun al Lai dals Quatter Chantuns han cumpensà questa gruppa cun novs giasts ord l'Asia, l'Orient Central ed ils Stadis Unids.
Quai n'è dentant betg gartegià uschè bain al Tessin ed al Grischun. Pervia da la mancanza d'alternativas èn ils chantuns sa focussads sin il martgà svizzer. Durant questa stad, nua ch'igl è strusch pussibel da far vacanzas en l'exteriur, han ils dus chantuns alura pudì profitar da questa decisiun.