In studi a la scola auta, quai saja nagut auter ch’ina academisaziun da la musica tradiziunala. Uschia hai tunà avant 15 onns da las persunas criticas, cura che la Scola auta da Lucerna ha lantschà il studi. Ed uschia tuni per part era anc oz, di Barbara Betschart, violinista da Sviz.
La glieud ha tema che l’autenticitad va a perder. Tradiziuns èn fitg impurtantas. Musica populara pon ins era far senza studi, i dependa dentant tge ch’ins vul.
Cunzunt per quels che stattan il pli gugent tar il tradiziunal na dovri betg exnum in studi. Impurtant tenor Barbara Betschart èsi da betg giugar ora in cunter l’auter persunas laicas e studegiadas.
La fin finala vai mo per la qualitad, n’emporta betg sche quai è sco laic ni sco studegià.
In ch'enconuscha omaduas varts è l’accordeonist Fränggi Gehrig. Gia sco uffant ha el fatg musica populara cun sia famiglia ad Andermatt ed ha sunà blers onns sco laic. Suenter ses studi d’inschigner da construcziun ha el anc studegià a la Scola auta da musica da Lucerna musica populara. La renfatscha ch’el haja era senza studi pudì sunar vinavant accordeon auda el dentant darar.
Il pli savens forsa cura ch’ins suna chaussas pli spezialas ch’èn lunsch davent da la tradiziun, lura datti adina persunas a las qualas che quai na plascha betg. Quai ha dentant plitost da far cun la musica e betg cun il studi.
El ha dentant profità fitg da la vastadad da la scolaziun a Lucerna: Ses satgados musical saja ussa pli grond ed el haja er ina rait da contacts pli gronda, di Fränggi Gehrig. Da quest avis è era la violinista Barbara Betschart.
Ins n'ha uschiglio mai uschè bler temp da s’occupar cun la musica e ses differents stils sco durant il studi. Ultra da quai avain nus uss en Svizra bleras scolas da musicas e quellas dovran era scolastas e scolasts.
Per exempel per l’orgelet ni l’arpret. Che gist la basa possia profitar da las persunas a la scola auta crai era il musicist e dirigent Emil Wallimann dal chantun Sutsilvania che sesa era en la suprastanza da l’Associaziun federala da jodladers.
Blers chors engaschan persunas da la scola auta per lur scolaziuns internas, sco per exempel la furmaziun da la vusch.
E quai malgrà ch’igl ha dà dals jodladers per part critica massiva cura che la Scola auta da Lucerna ha introducì in studi da jodlar il 2018. Blers hajan gì tema che quai mainia ad ina elita arroganta e ch’i vegnia jodlà sco en l’opera, di Emil Wallimann. El sez saja dentant fitg persvads da quell’offerta.
Sche nus essan fitg sincers è nossa musica populara en Svizra in product da nischa.
El haja gronda speranza che la musica populara chattia dapli acceptanza en la populaziun. Gist era grazia al studi.