L’allianza burgaisa en il chantun Vad vul permetter la promoziun da gas. Pli gugent gas indigen che gas da Putin, ha ditg il president da la partida populara svizra dal Vad Kevin Grangier envers radio SRF. Ins stoppia duvrar las resursas ch’èn avant maun e betg esser talmain dependent dad imports di Grangier.
Avant passa 10 onns han ins chattà gas sut il Lac Léman cun far ina perfurada cun ina profunditad da fin quatter kilometers a Noville. Dentant n’è betg sclerì quant gas ch'è avant maun. Da quai temp ha dentant il parlament da Vad decidì cleramain in scumond da promover il gas. Quel scumond vul l’allianza uss abolir.
Per la presidenta dals verds dal Vad, Alice Genoud, è quai dentant in «no go», ha ella ditg en ina debatta al Radio RTS. Il scumond è decidì e cun energia regenerabla n’ha quai da far nagut.
Sch'il parlament avess tuttina dad abolir il scumond, lura lantschian ils verds da Vad in referendum, di Alice Genoud. Ed ella è segira che quel vegn ad avair success tar la populaziun dal Vad, causa che quella saja fitg sensibla per tematicas da l’ambient. Però cler è era, sch'il scumond vegniss propi abolì, va quai anc onns enfin ch'il gas po vegnir duvrà.