Hackers han publitgà en il Darknet datas da l'Uffizi federal da polizia (Fedpol) e da l'Uffizi federal da la duana e da la segirezza dals cunfins (BAZG). Els han nizzegià in punct flaivel sin ils servers da la firma da ch'ha tgirà questas datas.
La Fedpol ed il BAZG han confermà sonda a l'agentura da novitad Keystone-SDA l'enguladitsch da datas e la publicaziun. La gasetta da la Svizra franzosa «Le Temps» aveva rapportà ordavant en chaussa. Tenor quella èn era pertutgadas polizias chantunalas.
Il purschider da software Xplain haja infurmà Fedpol davart l'attatga da Ransomware, ha declerà in pledader da Fedpol. L'autoritad saja vegnida infurmada avant intgins dis en chaussa. Suenter il stan da las enconuschientschas ad uras na sajan nagins projects dal Fedpol pertutgads, ha el relativà.
Xplain n'haja nagin access a las datas productivas dal Fedpol, mabain disponia be da datas da simulaziun anonimisadas per intents da test, uschia il pledader vinavant. Il Fedpol na sappia betg en tge dimensiun che las datas enguladas da la correspundenza cun ses clients da Xplain vegnian publitgadas.
L’Uffizi federal per duana e segirezza al cunfin ha medemamain confermà l’attatga da cyber, ha dentant era restrenschì la muntada da quella. «Las datas da l’uffizi federal sez n’èn betg pertutgadas», ha ina pledadra declerà. I sajan pertutgadas sulet datas da la correspundenza cun clients.
Armada betg pertutgada
L'armada svizra ch'ha medemamain datas tar il purschider Xplain na saja betg pertutgada, ha ditg in pledader dal departament da defensiun (VBS) a Keystone-SDA. Sin fundament dals scleriments da fin ussa possian ins partir dal fatg che l'incident tar il Fedpol ed il BAZG n'haja betg chaschunà ina perdita da datas en ils sistems da l'armada.