Regularmain vegn fatga la proposta d'integrar era dunnas en la Guardia svizra papala. A chaschun da la saramentaziun ha il president da la fundaziun per ina caserna nova da la guardia, Jean-Pierre Roth, puspe purtà quest tema. L'anteriur president da la banca naziunala ha ditg che la caserna nova, che duaja esser pronta il 2030 saja en mintga cas er adattada per integrar dunnas en la guardia.
L'anteriur maior da la guardia papala William Kloter na vesa il mument però insumma nagin signals en questa direcziun. Suenter avair legì ils divers artitgels da gasetta haja el contactà diversas funtaunas a Roma per sa far in purtret. Ma sco gia da ses temp haja sa mussà che las propostas sajan aria chauda. La guardia papala en mintga cas saja adina pronta per tut las propostas – en il center stettia il servetsch al pontifex e la protecziun e la segirezza dal papa. La fin finala decidia entant il papa ed il cumandant haja d'execuir. Il surmiran è però persvas ch'i cuzzia anc in detg mument enfin che l'emprima dunna fetschia servetsch en la Guardia svizra papala.