La Svizra duai surpigliar sia part da la responsabladad, quai che pertutga survegliar ils cunfins externs dal spazi da Schengen. Uschia motivescha in comité da differentas partidas ses Gea al schlargiament da la participaziun svizra a la Frontex che vegn a l'urna ils 15 da matg. Il comité Gea ha lantschà oz a Berna sia campagna per il schlargiament da la «Guardia europeica da cunfin e da costa» Frontex. Al comité fan part la PLD, l'Allianza dal Center, ils Verdliberals, Economiesuisse e la Federaziun svizra dal turissem.
Cun l'entrada en il spazi da Schengen, haja la Svizra s'obligà da surpigliar svilups da la convenziun, di la cussegliera naziunala Tiana Angelina Moser dals Verdliberals da Turitg. Ella referescha al Gea tar las directivas d'armas da l'onn 2019. Per il referendum da lez temp valia il medem sco oz.
Tgi che di A, sto era dir B.
Ils adversaris dal schlargiament che han lantschà il referendum din ch'ils daners supplementars per la Frontex han per consequenza ch'ils cunfins vegnian anc serrads pli fitg. En pli vegnan sgols spezials per expulsiuns sforzadas ad esser pli svelts. Frontex saja fitg impurtant,k sch'i va per la degradaziun dals fugitivs tras expulsiun.
