Questa damaun han plirs automobilists en la Bassa gì da sgarar per l'emprima giada ils vaiders da lur autos. Il pli fraid èsi stà la notg sin la Glattalp en il chantun Sviz cun minus 22,1 grads. Minus 15,4 grads hai dà tenor Meteonews sin il pass dal Fuorn e minus 12,4 a Samedan. Er a Bivio ed Andermatt hai dà temperaturas sut minus 10 grads.
La raschun per la sfradentada mumentana è tenor SRF Meteo aria polara da la Grönlanda e notgs stailidas.
Che l'emprima schelira vegn pir uschè tard il november, n'è betg usità. En blers lieus en la Bassa n'hai dà fin uss anc betg in di da schelira. En la media a lunga vista, sajan da spetgar set fin 12 dis da schelira il november. L'ultima giada è il november stà il 2014 senza schelira.