Cifras concretas tar ils custs na datti anc betg. Las calculaziuns mussan dentant ch'i guarda or fitg bain. Tenor ils organisaturs haja simplamain tut funcziunà durant la festa. A profitar dal success finanzial vegnan tranter auter ils clubs da lutga dal chantun. Quels survegnian radund 850'000 francs. Plinavant survegnian er ils voluntaris dapli daners che previs, radund 1,4 milliuns francs.
Per ils organisaturs dettia differents motivs daco che la festa saja stada in success finanzial. Tranter auter saja l'aura stada fitg buna, entras quai hajan ins dastgà beneventar dapli aspectaturs che previs. Quintà avevan ils organisaturs da la festa federala da lutga cun radund 350'000 persunas. A la fin sajan dentant passa 420'000 persunas stadas da la partida durant ils 3 dis da festa a Zug.
RTR novitads 12:00
