Schegea ch’il coronavirus chaschuna grondas consequenzas negativas datti firmas che profiteschan per part da la situaziun. Cunzunt furniturs e vendiders da victualias san trair a niz la situaziun.
Blers cumpran sin reserva
Tenor la pledadra da medias dal Coop, Marilena Baiatu, sajan blers products pli tschertgads che normalmain. Cunzunt las cumpras da victualias ch’èn bain conservablas èn s’augmentadas dapi l’emna passada. Era la purschida da laschar directamain furnir las victualias a chasa vegn duvrada pli savens. Stretgas da furniziun na sajan il mument betg in problem.
Ils magasins sa svidan
Il producent da victualias «Hero» declera envers RTR che la dumonda suenter tscherts products sco conservas da verduras, raviolis e rösti saja sa triplada dapi l’emprim da mars. Blers products san vegnir reproducidas a curta vista. Tar chaussas stagiunalas sco per exempel conservas da verduras vegn simplamain vendì anc quai ch’è en ils magasins.