I sa tractia dad ina schanza singulara, che la Svizra possia far pli enconuschent sias fermezzas en l'entira regiun, communitgescha il schef da «Präsenz Schweiz». L'exposiziun mundiala dura sis mais – 192 pajais en da la partida. Il pavigliun svizzer ha ina front cun spiaghels en furma d'in dratguir ed in tarpun da bainvegni cotschen da 700 meters quadrat.
En l'intern vegni mussà destinaziuns turisticas. Plinavant sa preschenta la Svizra sco center d'innovaziun cun differents projects che vegnan preschentads. Il budget per la preschientscha da la Svizra munta a radund 15 milliuns francs. La mesadad dals daners vegnan tranter auter dad interpresas svizras, sco per exempel Schindler, Rolex AG, Clariant, Novartis, Nestlé u er Roche.
Critica gia ordavant
La participaziun e cunzunt il sponsoring per il pavigliun svizzer avevan gia avant dus onns chaschunà grondas discussiuns. Il 2019 era vegnì enconuschent ch'il concern da tubac Philip Morris vegnia a sustegnair il paivgliun cun plirs tschientmillis francs.
Suenter critica da differentas partidas, da l'Organisaziun mundiala da sanadad WHO ed er pliras organisaziuns svizras ha alura il minister da l'exteriur Ignazio Cassis decis da desister sin il sustegn da 1,8 milliuns francs.
