La dumonda ha survegnì nov'actualitad suenter che la regenza austriaca ha introducì glindesdi la regla da 2G. Quai munta che mo persunas vaccinadas e guaridas dastgan anc visitar ustarias, hotels, clubs ed il coiffeur. La situaziun en noss pajais vischin na saja dentant betg da cumparegliar cun la nossa, ha il president da las medias e dals medis chantunals en Svizra Rudolf Hauri ditg sin dumonda.
Era en Svizra creschia il dumber d'infecziuns. Las ospitalisaziuns restian dentant pli u main stabilas. Ins stoppia perquai bain observar la situaziun, ha Hauri menziunà. Il mument saja dentant ord vista epidemiologica senz'auter giustifitgà da restar tar la regla da 3G en Svizra.
Glindesdi ha l'Austria nudà passa 7'000 infecziuns novas cun il coronavirus. Quai è dapli ch'il maximum durant la segunda unda da corona avant in onn. Creschidas fermamain èn era las ospitalisaziuns.