La presidenta da la Crusch Cotschna Svizra, Barbara Schmid-Federer sa retira per immediat. Ella bandunia ses post ord raschuns da sanadad communitgescha la Crusch Cotschna Svizra. Ses pass duai dentant era gidar ch'il focus da la publicitad sa drizzia puspè sin la lavur da l'organisaziun d'agid.
Critica vi da la presidenta
Tar la Crusch Cotschna Svizra ha procurà la separaziun dal directur da blers onns Markus Mader per tensiun. La relaschada saja stada intransparenta, nunprofessiunala ed inumana. A questa conclusiun è in’examinaziun independenta vegnida.
En pli ha il rapport crititgà la presidenta actuala Barbara Schmid-Federer ferm: Ses cumportament entaifer il cussegl da la Crusch Cotschna e surtut envers il directur sajan indizis ch’ella saja strusch qualifitgada da manar e ch’ella n’haja betg il curaschi da prender per mauns ina sfida. Schmid-Federer ha refusà questas renfatschas. Il rapport independent saja manglus.
Er problems structurals
Mez december era la Crusch Cotschna sa separada immediatamain da ses directur Markus Mader. Silsuenter eran sa retratgs quatter commembers dal cussegl e gremi da la Crusch cotschna. Tenor il rapport hai dà in problem structural tar il conflict cun Mader: sco en autras organisaziuns decentralas haja quai adina puspè dà tensiuns, spezialmain tranter ina part da las uniuns chantunalas ed il post da gestiun.
Ils auturs dal rapport crititgeschan en spezial ch'il gremi directiv da la Crusch Cotschna n' haja betg dà ina dumonda en scrit al gremi directiv cun ina motivaziun detagliada per revocar Maders.