Grazia a la victoria da l'artist Nemo vegn la proxim'ediziun da l'Eurovision Song Contest (ESC) ad avair lieu en Svizra. La dumonda è uss mo pli en tge citad.
Genevra ha il venderdi uffizialmain inoltrà sia candidatura per la 69avla ediziun da l'ESC da l'auter onn. La citad ed il chantun han inoltrà in dossier cuminaivel. En quel fa Genevra attent a sia infrastructura en il cumplex Palexpo, sia rait da viafier, ses eroport e sia spierta da hotels. Vitiers ha la regenza genevrina sincerà da sa participar cun 30 milliuns francs a l'organisaziun da l'ESC 2025.
Turitg sa vesa sco predestinà
La citad da Turitg ha annunzià da vulair organisar l'ESC 2025. Integrà en l'entir project èn il Hallenstadion, la Landiwiese al Lai da Turitg e la chasa da congress. Las shows duain avair lieu en il Hallenstadion che porscha radund 15'000 plazs.
Avant aveva il parlament da la citad da Turitg approvà duas moziuns correspundentas. L'incumbensa a la regenza da la citad è stada, d'examinar co ch'ella pudess s'engaschar per ina candidatura da Turitg. La presidenta da la citad Corine Mauch aveva declerà al parlament ch'ins lavuria gia intensivamain e fitg motivà vi da las preparaziuns per ina candidatura.
I dat anc bleras dumondas, ma nus sclerin tut quellas a moda fitg seriusa.
Ils Bernais vulan era – cun forzas unidas
Berna e Bienna han decidì da candidar communablamain sut il slogan «Bern United». Las duas citads vulan organisar la concurrenza en la nova Berner Festhalle che vegn actualmain construida. Per ulteriuras parts da l'occurrenza pudess star a disposiziun la Tissot Arena a Bienna.
L'ESC 2025 na vegn betg ad avair lieu a Son Gagl. La citad ha retratg lur candidatura pervia da las cundiziuns strictas. Quellas na possia la citad da Son Gagl tenor ina communicaziun betg ademplir.
Il maun public avess gì da surprender custs da 30 fin 40 milliuns francs. Ina candidatura saja pia «actualmain betg realistica».
Reclama ed attenziun internaziunala per la citad elegida
Pervi da l'attenziun internaziunala che l'occurenza da musica porta a la citad elegida – è l'ESC senz'auter d'interess per pliras citads. Candidaturas vegnan acceptadas enfin la fin da zercladur. La decisiun finala nua che la concurrenza vegn ad avair lieu duai lur suandar enfin la fin d'avust. Cura che l'ESC 2025 duai exact avair lieu n'è anc betg cler.
