La Svizra vul far part a l’iniziativa europeica per la defensiun da l’aria «Sky Shield». Ina decleraziun d'intenziun correspundenta ha la cussegliera federala Viola Amherd suttascrit.
I va per ch'ils pajais che sa participeschan cumpran sistems da defensiun d'aria ch'èn cumpatibels. En il cas d'urgenza, per exempel cura ch'i capitass ina attatga sin tut ils pajais, pudessan ils sistems funcziunar ensemen. E cun organisar las fatschentas ensemen possian ins er survegnir meglras cundiziuns sin la fierra d'armas.
A l'iniziativa fan part fin uss 17 pajais, cun excepziun da l'Austria èn quels tuts er en la Nato.
«Betg sa maschadar en in conflict ester»
Per il sistem da defensiun vul la Svizra collavurar cun ils stadis europeics. Sin dumonda d'in schurnalist da SRF ha ella dentant ditg che la collavuraziun finescha, «en in cas d'urgenza cura ch'ins sa maschaida en en in conflict ester».
Ins vegnia sez a decider en tge secturs ch'ins sa participeschia. Er sia collega Klaudia Tanner da l'Austria di che ses pajais vegnia a restar neutral. Il departament da Viola Amherd, il VBS, ha gia ditg il mardi ch'ina participaziun da la Svizra vi d'in tal sistem da defensiun europeic saja cumpatibel cun la neutralitad.
La Svizra e l’Austria vegnan a fixar lur resalvas en connex cun lur neutralitad en ina decleraziun supplementara.
