Eliminar il virus da HIV enfin en 7 onns. Quai è la finamira dal Cussegl federal. Enfin il 2030 na duai nagin pli s’infectar cun il virus da HIV en Svizra. Cuntanscher quai veglia el cun in nov program da «stop aids», ha il Cussegl federal annunzià quest’emna.
Ma sper il virus d'Aids èn er autras malsognas en il focus. Part dal program dal Cussegl federal èn era Hepatitis-B, Hepatitis-C e malsognas transmissiblas tras contact sexual.
Il program è cunzunt drizzà envers persunas ch'han ina ristga auta da s'infectar. Cunzunt persunas giuvnas duain esser attentas da las ristgas e savair, sco ch'ellas pon sa proteger. Ina part dal program èn er tests ch'èn accessibel a moda simpla. E las cassas da malsauns vegnan a surpigliar a partir dal 2024 ils custs per la profilaxa da pre-exposiziun.
Suenter che las cifras èn idas enavos durant plirs onns èn ellas puspè creschidas l’onn passà. La finamira saja ambiziusa. L’Uffizi federal da sanadad BAG e l’agid cunter SIDA Svizra èn persvas ch’i saja pussaivel da reducir sin 0 las infecziuns da HIV, hai num.
L'emprima campagna cunter HIV è vegnida lantschada il 1987.