Manaschis cun emprendistas ed emprendists en Svizra na vesan betg uschè gugent sche quels fan la maturitad professiunala parallel tar l'emprendissadi. Quai muntia ad in di dapli scola ed in di pli pauc en fatschenta e quai na vulan ils manaschis betg, rapporta SRF. Uschia fan pli blers la matura suenter l'emprendissadi.
Las proporziuns èn spustadas
Avant 10 onns per exempel faschevan anc 55% da las absolventas e dals absolvents la maturitad professiunala accumpagnant tar l'emprendissadi, il rest suenter avair terminà quel. Oz è la proporziun precis viceversa. Decisiv è qua la purschida. Intgins manaschis sclaudan gia la maturitad professiunala en la descripziun da la plazza.
Per patruns saja il focus da preparar il emprendists e las emprendistas per l'attestat da qualificaziun, di Nicole Meier, la manadra da la scolaziun professiunala da la federaziun da patruns. La finiziun da l'emprendissadi saja pli impurtanta che la matura professiunala. Cunquai ch'ils manaschis han però adina dapli difficultads da chattar emprendistas ed emprendists pudess quai sa midar.
Or da l'archiv:
