Il pli impurtant è per Andrin Ehrler da la PS che las banderolas vegnan recicladas. Ina part dattan els a scolas per zambregiar insatge – forsa ina tastga u ina tastgetta da tualetta. Pia èsi bain pussaivel, che la fatscha da Jon Pult u da Franziska Preisig sa chatta bainbaud en la stanza da bogn sper la pasta da dents. Er ils placats e las banderolas da l’Allianza dal Center vegnan reciclads. Tenor Maurus Tomaschett van quests al recicladi a Rueun e vegnan suenter dads vinavant ad ina fatschenta che fa ordlonder granulat.
Vandalissem
Betg tut ils placats che las partidas han pendì si san vegnir demontads. Intgins èn gia avant vegnids davent pervia l’aura u per la gronda part pervia vandalissem. «A Sumvitg èn trais placats vegnids dads fieu», di Maurus Tomaschett da l'Allianza dal Center.
Era placats da la Partida socialdemocratica èn vegnids demolids u las fatschas èn vegnidas sfiguradas. Tenor Andrin Ehrler ha quai da far cun il gieu politic. «I dat persunas ch’èn betg da la medema opiniun e che demoleschan uschia ils placats», suppona Andrin Ehrler.
