-
Bild 1 von 2Legenda: Ils candidats da la PS per il cussegl naziunal Da sanester a dretg: Philipp Wilhelm, Erika Cahenzli, Sandra Locher Benguerel, Jon Pult, Franziska Preisig. RTR, Pietro Jacomet -
Bild 2 von 2Legenda: «Standing ovations» – unanimamain e cun ferm applaus è la glista per il cussegl naziunal da la PS vegnida approbada dals delegads. RTR, Pietro Jacomet
La radunanza da nominaziun da la PS Grischun dals 2 da favrer ha sco spetgà betg procurà per surpraisas. Las candidatas ed ils candidats per il Cussegl naziunal èn vegnids nominads sco proponids ed er la candidatura dubla da Jon Pult han ils delegads da la PS Grischuna sustegnì fermamain. Uschia spera la PS Grischuna da defender il sez da la cussegliera naziunala partenta Silva Semadeni ed ultra anc gudagnar in sez en il Cussegl dals chantuns. Interessant è che la media da vegliadetgna dals candidats è mo pauc sur 40 onns.
Il secretari da partida, Lukas Horrer, ha fatg attent, ch'in sez en il Cussegl naziunal na saja betg garantì e ch'i dovria in bun cumbat electoral. Ils delegads èn dentant fitg optimistics, cunzunt quai che pertutga Jon Pult.
Jon Pult vegn a far furora a Berna – u en il Cussegl naziunal u en il Cussegl dals chantuns.
Il retoricher per se – ma tge ha Pult gia cuntanschì?
Sco bun retoricher saja Jon Pult enconuschent en l'entir Grischun. El è abel da s'exprimer en tut ils trais linguatgs chantunals. Cura ch'i va dentant per numnar si chaussas concretas ch'el ha muventà sin nivel politic, lura ston era intgins delegads studegiar curt.
Plirs numnan alura ses merits en connex cun impedir ils gieus olimpics en il Grischun, ses engaschament per la natira u sia lavur en il Cussegl grond – per exempel il sforz d'engaschar l'emprima cumissiun parlamentara d'inquisiziun en il Grischun en connex cun il scandal da cartels. Medemamain vegn era ses agir sco president da la PS Grischuna menziunà: El haja en general dà in grond schlantsch als Socialdemocrats dal chantun Grischun ils davos onns.
RR actualitad 07:00