Il project independent da partidas «Helvetia cloma» ha la finamira da purtar dapli dunnas en il Parlament federal. Il team enturn la co-presidenta dad Alliance F, Kathrin Bertschy, ha entant pudì evaluar radund 90% da las glistas principalas. Ed els vegnan a la conclusiun che marcantamain dapli dunnas candideschan.
En media saja la cumpart da las dunnas sin las glistas creschida per 5 puncts procentuals – cumpareglià cun avant quatter onns. En tut sajan 39% da las persunas che candideschan dunnas, ha declerà Kathrin Bertschy envers SRF.
La Verda e la PS a la testa
La Verda e la Partida socialdemocratica promovan gia pli ditg las dunnas. Actualmain han quellas duas partidas cun 55% respectiv 51% schizunt dapli dunnas che umens sin lur glistas principalas.
Però er tar las ulteriuras partidas cun fermezza da fracziun candideschan dapli dunnas: Tar la Partida liberaldemocratica è creschida la cumpart da candidatas per 9 puncts procentuals, tar la Partida verd-liberala per 11 puncts procentuals e tar la Partida burgais-democratica per 6 puncts procentuals. Tar la PLD e la PBD èn uss radund 40% dals candidats dunnas, e tar la PVL 44%.
Cumpart da dunnas sin las glistas da las partidas
Partida | 2019 | 2015 |
La Verda | 55% | 51% |
PS | 51% | 47% |
PVL | 44% | 33% |
PLD | 40% | 31% |
PBD | 39% | 33% |
PCD | 38% | 34% |
PEV | 37% | 41% |
PPS | 23% | 19% |
RR novitads 08:00