Divers exponents da las partidas naziunalas han crititgà envers Radio SRF las retschertgas avant las votaziuns. Il manader da campagna da la PPS, Adrian Amstutz, pretenda schizunt ch'ils barometers che vegnan «finanziads cun meds publics» vegnian scumandads. Cun quai manegia el ils barometers da la SRG SSR. Ed il manader da campagna da la Partida verda, Balthasar Glättli, vul ch'ins pondereschia reglas per ils barometers.
In bun purtret dal mument
Exponents da las partidas grischunas na sustegnan betg quella critica. Ils barometers èn da principi bainvegnids tar els. Il president da la Partida cristiandemocratica, Stefan Engler, e ses collega d'uffizi da la Partida liberaldemocratica, Bruno Klaus, sco er Beno Niggli da la Partida burgaisdemocratica, manegian ch'in stop da barometers cura che las bustas d'elecziuns sa chattian gia en chascha da brevs, saja da ponderar.
Gidà n'ha il barometer segir betg a nossa partida.
Dentant dian els era ch'in barometer sco tal saja in bun purtret dal mument per savair nua ch'ins stettia, e tut tenor possian ins agir sco partida.
Las partidas decidan sco ir enturn cun barometers
Ils barometers sajan in instrument e tge ch'ins fetschia cun quel saja chaussa da mintga partida, di il president da la fracziun dal Cussegl grond da la PPS, Jan Koch. El manegia ch'il barometer grischun avant las elecziuns haja perfin gidà a sia partida da mobilisar anc ina ultima giada avant las elecziuns.
Era Gaudenz Bavier dals verd-liberals vesa in avantatg e betg dischavantatgs en in barometer. Finalmain tutgian tals tar in cumbat electoral e sco partida survegnian ins ina valitaziun dal mument. Ins vesia sch'ins saja sin buna via u betg e tut tenor stoppian ins adattar il concept. Forsa sajan els dentant causa las bunas prognosas sa fidads memia ferm sin il barometer, agiunscha Bavier. E perquai n'haja betg tanschì per in sez en il Cussegl naziunal.
Il problem n'è betg il barometer
Anita Mazzetta da La Verda sco era Philipp Wilhelm da la Partida socialdemocratica vesan il problem en in auter lieu e betg tar il barometer.
Jau na crai betg ch'in barometer ha ina influenza sin ils resultats dad ina elecziun. Auters facturs sco daners, rapports da medias u temas actuals che fan quitads a la populaziun han ina pli gronda influenza.
Barometers èn impurtants per prevair scenaris pussibels
Il politolog Michael Hermann da l'Institut Sotomo di, ch'el faschess en sasez gugent dapli barometers d'elecziuns. En auters pajais dettia quai bler dapli barometers ed instituts che fetschian barometers. Fin in di avant vegnian là preschentads novas retschertgas tar las elecziuns.
Scientificamain na pon ins betg cumprovar, sche barometers han in'influenza sin il resultat final da las elecziuns.
En Svizra desistin nus 10 dis avant las elecziuns da publitgar novas retschertgas. Tenor Michael Hermann è quai ina buna regulaziun, cunquai ch'ins na possia betg mussar si scientificamain che barometers hajan ina influenza sin il resultat final, na midass in barometer durant ils 10 dis pli che franc betg ils resultats finals.
RR actualitad 12:00