Per las elecziuns naziunalas dals 20 d'october fan las partidas dal center grischunas, La Partida liberaldemocratica, la Partida burgais-democratica e la Partida cristian-democratica, ina colliaziun da glistas. La finamira saja da concentrar las vuschs dal center burgais en il Grischun, han annunzià las partidas. Las premissas sajan uschia cumparegliablas cun quellas dad avant quatter onns.
Ils partenaris da l’allianza reageschan cun quest pass sin la colliaziun da glistas dad avant 8 onns. Tras ina colliaziun tranter la PS, ils Verds ed ils Verdliberals aveva il bloc burgais pers in sez en il Cussegl naziunal.
Fin uss è quai la segunda colliaziun da glistas ch'è vegnida annunziada. La Partida verd-liberala, la Partida socialdemocratica e la Verda han gia fatg la uschenumnada «allianza dal clima».
«Segirada vers la sanestra ed attatga vers la dretga»
Il politolog Clau Dermont n'è betg surstà da quella colliaziun da las partidas dal center. Dad ina vart saja quai ina segirada cunter la bastiun sanestra; che lezzas partidas na fetschian betg in segund sez. Da l'autra vart saja quai dentant era ina signal vers la PPS. Las partidas dal center annunzian lur ambiziun da conquistar in dals dus sezs da la Partida populara svizra. Quai pudess tenor il politolog Clau Dermont era reussir:
Ils temas «migraziun» ed «UE» na funcziunan betg uschè bain per il mument. Uschia pudessi esser che la PPS perda in sez a la gronda colliaziun dal center.
PPS deplorescha
Per la PPS è la la colliaziun da las partidas dal center pauc surprendenta.
Nus avain stuì constatar che nossa purschida da far ina glista burgaisa communabla n'è betg vegnida stimada da las ulteriuras partidas. Perquai avain nus fatg quint cun quai che las partidas dal center fan quella colliaziun.
Plinavant ha Brand ditg che la PPS deploreschia ch'i na saja betg stà pussaivel da realisar ina glista burgaisa communabla. Tuttina na tema el betg per ils sezs da la PPS. Il ristg da perder in sez a la sanestra vesa Heinz Brand plitost tar las ulteriuras partidas.
RR novitads 15:00
