Tgi che vuleva fin ussa vender ses auto electric sco occasiun, stueva per il solit prender en cumpra grondas reducziuns da pretsch. Spezialmain il temp da cursa cun ina battaria era in motiv per esser precaut per persunas che cumpran potenzialmain in auto d'occasiun.
Ma las cifras las pli novas mussan, las valurs restantas d'autos electrics, pia ils pretschs sin il martgà secundar, èn s'adattads ils ultims onns tar ils autos da benzin e da diesel.
Tgi che venda actualmain ses auto electronic sco occasiun, survegn en media circa tuttina bler raps sco per in occasiun da benzin ni diesel. Ussa da sia vart stat la dumonda creschenta per tals autos, di Daniel Schaller da la casa d'autos Hutter a Winterthur. «Nus constatain che la dumonda per vehichels electrics è creschida massivamain. Surtut autos ch'èn pli vegls u che han in pèr kilometers dapli èn tschertgads oz sin il martgà secundar.»
Tenor Philipp Zimmermann che registrescha dapi decennis tut las datas d'autos da persunas, vehichels utilitars e motos ch'èn immatriculads en Svizra per la branscha, discurran plirs motivs daco ch'il commerzi d' occasiuns cun autos electrics mo creschia vinavant. «Oz èn bain represchentads tar vehichels electrics ultra da models d'access pitschens e dad SUV gronds er ils autos da la classa mesauna. Vitiers vegn ch'ils consuments enclegian oz che las ritgezzas èn pli grondas, che las battarias tegnan pli lungas e ch'ils custs da gestiun èn pli bass.»
E-occcasiuns sa vendan pli svelt
Ma na be ils predschs per autos electrics d'occcasiun sun creschids, vehichels electrics vendan er pli svelt co benzin o diesel. In media dura quai 71 dis fin ch'els chattan in nov possessur d'autos. Quai observa er Daniel Schaller. «Ils autos giran relativamain svelt. Sche nus mettain oz in tal auto «online» sin las differentas plattafurmas, lura chattain nus svelt in cumprader. Ubain empruvain era da servir nossa clientella existenta cun tals vehichels.»
