Il Cussegl dals chantuns vul impunder dapli daners per l'agricultura che quai ch'il Cussegl federal propona. En la debatta davart il preventiv ha el decis d'augmentar las expensas per 54,8 milliuns francs. La chombra pitschna suonda cunquai ina minoritad da la cumissiun da finanzas e votescha per laschar ils pajaments directs per il 2024 sin il nivel dal 2023. Quai munta tut en tut 2,8 milliardas francs.
Era ha la chombra pitschna decis da dar 55 milliuns francs dapli al traffic public. Il Cussegl federal aveva proponì da reducir las expensas per 5 milliuns. Ins na veglia betg ristgar da periclitar la purschida attractiva per l'entir pajais, uschia il cusseglier dals chantuns grischun Stefan Engler.
Cun questas adattaziuns n'è il preventiv betg pli confurm al frain a l'indebitament. Per la ministra da finanzas, Karin Keller-Sutter, èsi uss cler, ch'ins sto metter prioritads.
Jau na ves propi betg pli ina libertad d'agir.
Il Cussegl dals chantuns ha approvà il preventiv cun questas midadas, cun gronda maioritad. La gievgia debattescha il Cussegl naziunal en chaussa.
Pli svelt dapli daners per l'armada
Era a lunga vista n'è il Cussegl dals chantuns betg stà en la luna da spargnar, tar la debatta da preventiv il mardi. L'armada duai numnadamain survegnir pli spert daners, che quai ch'il Cussegl federal propona. Gia il 2030 e betg pir il 2035 duai la Svizra impunder 1% dal product naziunal brut per la defensiun dal pajas. Questa decisiun da princip ha il Cussegl dals chantuns prendì en il rom da la debatta dal preventiv.
Co la Confederaziun duai finanziar questas expensas supplementaras, n'ha il Cussegl dals chantuns betg decidì. D'augmentar pli spert il preventiv da l'armada na saja betg raschunaivel, en vista a la situaziun finanziala actuala da la Confederaziun, ha la ministra da finanzas Karin Keller-Sutter manegià da ponderar.
