La Svizra ha tschertas atgnadads. Ina da quellas: Cun flanar tras las giassas da Berna entaupan ins magari ina cussegliera federala. E la stad stat er il «Stapi» en colonna per in glatsch amez il quartier. Uschè lunsch, uschè idillic.
Ma deplorablamain è quai er in cliché. Ils adversaris da las mesiras da corona per exempel n'han betg mo scurlattà vi da las bloccadas da la Chasa federala avant prest trais onns, mabain er vi dal maletg che la Svizra ha da sasezza.
Ina part da la vardad è oz era quai: Persunas che van en la politica dovran in pail gross – e quai betg mo sin plaun naziunal. Per far frunt a las renfatschas ha per exempel il chantun Turitg lantschà ina plattafurma via la quala politicras e politichers pon annunziar messadis d'odi, insultas e smanatschas.
Odi e violenza en la politica locala
Perscrutadras e perscrutaders dal Center per democrazia Aarau han uss evaluà las dimensiuns da las agressiuns era sin plaun communal. Suenter l'interrogaziun da bundant 1'000 commembras e commembers da parlaments vegnan els a la conclusiun: Er en las citads èn las politicras ed ils politichers exponids pli e pli ad attatgas. L'evaluaziun mussa: Da principi èn las parlamentarias ed ils parlamentaris bain cuntents cun lur mandat. En spezial sch'els manegian d'avair pli grond'influenza. «Passa in terz da las interrogadas e dals interrogads ha dentant inditgà d'avair fatg experientschas cun violenza verbala ils ultims dudesch mais», declera Stefan Kalberer, collavuratur scientific da l'institut da perscrutaziun. Var in terz è vegnì attatgà verbalmain durant il temp correspundent – saja quai en la rait u sin via. 6,4% da las persunas interrogadas han fatg experientschas cun attatgas sin lur proprietad, 3% èn vegnidas attatgadas fisicamain.
Dunnas e persunas politicamain da la dretga pli pertutgadas
Tenor l'enquista èn las dunnas exponidas pli savens a violenza verbala ed a donns da materials. Ultra da quai èn las commembras ed ils commembers dal parlament che sa posiziuneschan da la vart dretga dal spectrum politic pertutgadas pli fitg da violenza fisica. La violenza influenzescha il cumportament dals commembers dal parlament. Blers dals dumandads din ch'els hajan midà lur diever da las medias socialas e lur communicaziun. Auters hajan schizunt renunzià lur mandat politic pervia da las experientschas negativas. Quai inditgeschan dapli dunnas ch'umens.
Consequenzas per la democrazia
Las attatgas sin plaun local èn preoccupantas per las perscrutadras ed ils perscrutaders. «Sch'ins considerescha las vischnancas sco 'scola democratica', è quai ina nauscha novitad», di Daniel Kübler, commember da la direcziun da l'institut da perscrutaziun. Atgnamain saja la pitschnadad d'ina vischnanca in factur ideal per reducir ils pregiudizis envers ils adversaris politics. Il terren perfetg per ina cultura da debatta paschaivla e democratica po dentant sa transfurmar en ses cuntrari: El daventa in'arena per odi e disfamaziuns che na capitan betg pli mo en il spazi virtual, mabain da fatscha a fatscha.
Dapli davart il tema:
