Dals 18 fin ils 22 da november ha lieu la segunda ediziun da l'emna da barat naziunala. Organisada vegn ella da Movetia, l'agentura naziunala per barat e mobilitad, en collavuraziun cun ils chantuns e cun sustegn da la SRG SSR sco partenaria da medias. Ils emetturs da radio e televisiun da la SRG SSR accumpognan l'emna cun contribuziuns. Passa 3'500 scolars e scolaras da l'entira Svizra vegnan a surpassar ils cunfins linguistics da noss pajais. Saja quai cun in'excursiun, ina cuntravisita, lavuratoris u in'activitad virtuala: a las classas participantas vegnan purschidas differentas pussaivladads da s'inscuntrar e da duvrar linguas estras.
Il november avant in onn ha il scolast primar Sandro Tomaschett preschentà ad autras scolastas e scolasts las experientschas ch'el ha fatg cun il barat quadriling a Mustér.
Il punct culminant da l'emna da barat naziunala è la conferenza da medias dals 19 da november cun il cusseglier federal Guy Parmelin, la cussegliera guvernativa Christine Häsler, represchentantas e represchentants dals chantuns e giuvenils da tut las regiuns linguisticas da la Svizra. A la conferenza da pressa vegnan scolaras e scolars a preschentar lur experientschas fatgas cun il Culturetrail elavurà dapi pliras emnas. Il Culturetrail è ina chatscha da stgazis culturala ed interactiva ch'ina classa da scola bernaisa ha organisà e che vegn absolvida ils 18 da november cun trais classas partenarias. Il post «far radio» vegn tgirà dad «ils auters, les autres, gli altri, die anderen», la gruppa da radio interregiunala da la SRG SSR.
Correspundentas rapportan da quai che muventa, fatschenta ed occupa vischinas e vischins en Svizra tudestga, franzosa e taliana.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
Barat da moderaziun tar SRF, RTS, RSI e RTR
Cun sia purschida collia la SRG SSR di per di las regiuns linguisticas. A chaschun da l'emna da barat naziunala fa ella quai cun in project spezial: moderaturas e moderaturs da SRF, RTS, RSI e RTR barattan lur plaz da lavur per in'emissiun e modereschan il format dad in'autra regiun linguistica – tant a la televisiun sco er en il radio. SRF e RTS van schizunt anc in pass pli lunsch: RTS producescha l'emissiun «Le 19h30» per tudestg per il public da la Svizra tudestga e SRF la «Tagesschau» per franzos per il public da la Svizra franzosa. Las emissiuns vegnan moderadas da las persunas usitadas, dentant en la lingua da l'autra regiun.
Film documentar «Chantez-vous Suisse» sin Play Suisse
Play Suisse lantscha a chaschun da l’emna da barat in film documentar davart il project da musica interregiunal «Chantez-vous Suisse?» al foss dal rösti a Friburg. Il film purtretescha tschintg musicist:as da tut las regiuns linguisticas e cun biografia da migraziun en il process co ch'els preparan ensemen in concert pluriling. Il film documentar è da vesair era sin ils emetturs da la SRG SSR.
Plurilinguitad tar la SRG SSR
Veglias tradiziuns, dialects sonors, differents stils da viver – las particularitads culturalas e linguisticas rendan unica la Svizra. La SRG SSR s'orientescha als basegns multifars da la populaziun svizra e renda visibla questa gronda diversitad en la vasta purschida da SRF, RSI, RTR e RTS. Saja quai en l'infurmaziun, la cultura, la furmaziun, il sport u il divertiment. Ed era sin Play Suisse gioga la plurilinguitad ina gronda rolla: cun sia vasta purschida da serias svizras sco «Tschugger» u «L’ultim rumantsch» – ch'èn disponiblas per tudestg, franzos e talian, per part schizunt per rumantsch – cuntanscha la plattafurma da streaming da la SRG SSR tut las regiuns linguisticas.
