En cas da stgarsezza da forza electrica u gas vul il Cussegl federal pudair installar in stab da crisa, quai ha el decis en sia sesida. Il stab duai cumplettar las organisaziuns da crisa actualas. Il stab vegn pir activà sch'i dat ina mancanza d'energia ed il martgà na funcziuna betg pli, scriva il Cussegl federal.
Post da contact
En pli vul il Cussegl federal in uschenumnà Single point of contact (SPOC), quai duai esser ina persuna che retschaiva tut las dumondas davart mesiras per spargnar energia dals chantuns e da secturs da l'economia. La crisa da corona haja mussà ch'i saja impurtant d'includer ils differents acturs gia avant grondas decisiuns, scriva il Cussegl federal. André Duvillard vegn ad installar e manar quest post da contact a partir dals 10 d'october, el è anteriur delegà da la Rait naziunala da segirezza.