La plattafurma chinaisa Temu venda dal tut: products per cuschinar, products electronics u er vestgadira. E quai en massa e per pretschs fitg favuraivels. La critica envers il surconsum vegn adina pli ferma.
Clientella digital affina
La clientella da Temu e da plattafurmas sumegliantas èn persunas plitost giuvnas ch'èn gia affinas quai che pertutga il cumprar via la rait. Quai di Johanna Gollnhofer, scienziada d'economia da l'Universitad Son Gagl, envers SRF.
Clera strategia
La strategia da vendita da Temu è clera: «Discovery Commerce». Translatà munta quai «Commerzi da scuvrir». Temu preschenta adina puspè novs products ch'avessan da svegliar interess tar il cumprader u la cumpradra.
Quella offerta prest infinita da products animeschia a surconsumaziun, declera David Hachfeld da l'organisaziun betg guvernamentala Public eye envers SRF.
Il consum da bittar davent è ord vista ecologica fitg problematic.
Er las cundiziuns da lavur tar ils affars da producziun sajan fitg nauschas. Tar pretschs uschè favuraivels na giaja quai er betg auter.
