La Confederaziun na duai betg stgaffir ina banca da datas centrala per armas da fieu. Da quest avis è la cumissiun responsabla dal Cussegl dals chantuns. Cun 9 cunter 3 vuschs è ella s’exprimida cunter quella proposta.
Tenor l’avis da la maioritad bastia la regulaziun vertenta, pia ch’ils registers d’armas chantunals èn colliads. En pli n’augmentass in register naziunal betg la segirtad publica e chaschunass duplicitads. Ed ella cuntrafaschess al principi da federalissem, e che la surveglianza d'armas e la polizia è en mauns dals chantuns.
Da l’avis cuntrari è dentant la cumissiun dal Cussegl naziunal ch’aveva ditg Gea a la proposta. Ella sto uss decider davart ils proxims pass. L'iniziativa è vegnida da Marionna Schlatter da la Partida verda.
Ina minoritad da la cumissiun dal Cussegl dals chantuns pensa, ch'in register central pudess far pli simpel la prevenziun en vista da dapli cumpras d'armas da sajettar. Ella deplorescha, ch'i na saja betg pussaivel da savair quant bleras armas ch'èn en mauns privats.